FFK-ja kërkon përkushtim të madh nga delegatët e ndeshjeve

02 shkurt 2018 | 16:39

Federata e Futbollit të Kosovës (FFK) ka mbajtur seminar me delegatët e ndeshjeve të Superligës dhe Ligës së Parë.

Nënkryetari i FFK-së, Agim Ademi, ka kërkuar nga delegatët më shumë përkushtim dhe syhapur në punën e tyre, në mënyrë që mbarëvajtja e ndeshjeve dhe në përgjithësi e garave të jetë sa më e mirë.

“Në vjeshtë kemi pasur njërin prej stinorëve më të mirë në aspektin organizativ, prandaj duam që në vazhdim t’i përmirësojmë gjërat edhe më shumë. Kemi pasur disa vërejtje gjatë stinorit vjeshtor për lëshimet dhe gabimet që janë bërë, e për të cilat mendoj se më shumë janë bërë për shkak të neglizhencës suaj se sa dijes”, ka thënë Ademi, duke shtuar: “E di se ju e dini këtë punë në thelb sepse e keni përvojën dhe vini nga bota e futbollit, por duhet më shumë përkushtim gjatë kryerjes së detyrës. Vërejtjet që i kemi pasur nuk kanë qenë aq të vogla, por jo edhe drastike. Prandaj, mundoheni maksimalisht që të jenë në nivel të detyrës. Në të ardhmen do të kemi edhe teste, të cilat do të udhëhiqen nga zyrtarë të UEFA-s, ashtu siç tashmë është bërë praktikë me gjyqtarët dhe kontrollorët e gjykimit”.

Ndërkohë, vërejtjet dhe sugjerimet për delegatët i kanë dhënë edhe anëtarët e Komisionit të Garave, Ismet Ahmeti, Isuf Ajeti e Sahit Kelmendi, sidomos në përpilimin e protokollit të ndeshjes.

Fjalët Kyçe:

Lajme të sponsorizuara

Të fundit
Në sallën e Asamblesë Komunale në Therandë të premten është…