Kërkohet nga Dogana që të vazhdojë me luftimin e korrupsionit

26 Janar 14:10

Kryeministri i Kosovës, Ramush Haradinaj, ka thënë se Qeveria është e përkushtuar në rrugën e saj për sundimin e ligjit.

Këtë deklaratë Haradinaj e ka dhënë në takimin e katërt të nivelit të lartë për sundimin e ligjit, ku në fokus ishte puna e Doganave të Kosovës.

Kryeministri Haradinaj ka theksuar se vetëm një veprim ndërinstitucional mund të sjellë suksese në përpjekjen e përbashkët për sundim të ligjit.

Për ambasadorin Amerikan në Prishtinë, Greg Delawie, Dogana e Kosovës duhet të vazhdojë me luftimin e korrupsionit dhe krimit të organizuar dhe se duhet vazhduar me reforma dhe me koordinim të punëve me akterë të tjerë për sundimin e ligjit.

Ndërkaq, shefja e Zyrës së BE-së në Kosovë, Nataliya Apostolova, ka pohuar se Bashkimi Evropian është donatori dhe partneri më i madh i vendit, në rrugën e tij për sundim të ligjit.

Drejtori i Doganave të Kosovës, Bahri Berisha, ka deklaruar se projeksioni i institucionit që ai drejton është që në vitin 2018, të ketë të hyra prej 1.175 miliardë euro, derisa 65 për qind e të gjitha taksave në Kosovë, grumbullohen nga Dogana.

Ndër sfidat e funksionimit të këtij institucioni u përmend krijimi i një njësie të përbashkët kombëtare të Inteligjencës dhe caktimi i Prokurorëve dhe Gjyqtarëve të veçantë për çështjet e Doganës.

Ministri i Financave, Bedri Hamza, ka thënë se Doganat e Kosovës e kanë mbështetjen e plotë në punën e tyre dhe se pikërisht për këtë, tashmë është ndarë buxhet për ndërtimin e objektit të ATK-së dhe Doganës. Gjithashtu, Hamza tha se ky institucion duhet të ketë parasysh që në pozitat udhëheqëse të vendosen persona në bazë të meritokracisë.

Nga ana tjetër, ministri i Drejtësisë, Abelard Tahiri, ka përmendur faktin që Avokatura Shtetërore aktualisht nuk po arrin t’i shqyrtojë të gjitha lëndët që kanë të bëjnë me Doganat, të cilat arrijnë shifrën prej 3260 lëndë dhe se në këtë drejtim po punohet që vetë Dogana t’i krijojë kapacitetet e saj për t’i trajtuar ato.

Në takimin e sotëm, morën pjesë edhe ministrja e Integrimeve Evropiane, Dhurata Hoxha, ministri i Punëve të Brendshme, Flamur Sefaj, shefja e EULEX-it, Alexandra Papadopoulou, dhe përfaqësues të tjerë nga institucionet përkatëse.

Takimi i radhës, i nivelit të lartë për Sundim të Ligjit do të mbahet pas një muaji, ndërkaq në fokus do të ketë punën e Prokurorisë dhe sfidat që e përcjellin.

Lajme të sponsorizuara

Të fundit
Të fundit
Deputeti i Lëvizjes Vetëvendosje, Sami Kurteshi, ka kërkuar që të…