Drejtoria për Mbrojtje dhe Shpëtim dhe ajo për Integrime Evropiane dhe Mbrojtje Sociale në Mitrovicë kanë marrë të gjitha masat për t’ju dalë në ndihmë banorëve të ndërtesës që u përfshi nga zjarri në rrethana të panjohura në rrugën e Kristaleve në Stantërg.

Në atë ndërtesë të vjetër që ishte pronë e Minierës me Flotacion “Trepça” në Stantërg po banonin disa familje me gjendje të rëndë sociale.

Drejtori i Drejtorisë për Mbrojtje dhe Shpëtim, Nehat Bahtiri, ka thënë se ende nuk dihen shkaqet e shpërthimit të zjarrit, por që Ekipi i zjarrfikësve të komunës ka intervenuar shumë shpejt dhe nuk ka lejuar që zjarri të zgjerohet.

“Ne jemi përkujdes për ofrimin e ndihmës emergjente për familjen e dëmtuar më së shumti, por edhe për familjet tjera në nevojë. Do të ndërmarrim të gjitha masat që familjet e ndërtesës të ndihen të sigurta”, ka thënë Bahtiri.

Ndërsa drejtoresha e Drejtorisë për Integrime Evropiane, Nazan Kërveshi, ka theksuar se ajo ka organizuar ofrimin e ndihmave për familjet e dëmtuara nga zjarri në këtë ndërtesë.

“Kemi ofruar pako me ndihma ushqimore për të gjitha familjet, ndërsa që për familjen e dëmtuar më së shumti, do të sigurojmë të gjitha ndihmat e nevojshme”, është shprehur Kërveshi.

Përveç dëmeve të konsiderueshme materiale, në këtë incident zjarri lëndime të lehta trupore kanë pësuar tre persona, të cilët janë trajtuar nga mjeku.

/Epoka e re/