Ylli i Barcelona, Raphinha, mund të përballet me pasoja serioze pasi katalanasit u eliminuan nga Atletico Madrid në Ligën e Kampionëve. Braziliani nuk u përmbajt pas humbjes 3-2 në total në stadiumin Metropolitano.

Raphinha udhëtoi drejt Madridit për të mbështetur bashkëlojtarët dhe u pa në fushë para ndeshjes së bashku me ta. Ai qëndroi në stol gjatë takimit dhe më pas u vu re duke bërë gjeste ndaj tifozëve të Atletico Madridit, duke lënë të kuptohet se ata do të eliminoheshin në gjysmëfinale të Champions League.

Ai foli edhe për mediat menjëherë pas ndeshjes, duke deklaruar se “ndeshja u vodh”. Raphinha theksoi se, sipas tij, vendimet e arbitrave shkuan kundër Barcelonës në të dyja ndeshjet e çerekfinales. Ai e përsëriti edhe një herë duke lënë të kuptohet se arbitrat ishin qëllimisht kundër klubit katalanas.

“Gjyqtarët kanë qenë të tmerrshëm; është e pabesueshme çfarë vendimesh ka marrë. Atletico bëri shumë ndërhyrje të palejuara dhe arbitri nuk u dha as karton të verdhë. Dua shumë të kuptoj frikën e tij që Barcelona mund të kalonte në raundin tjetër”.

Sipas raportimeve, Raphinha mund të dënohet për veprimet e tij. UEFA mund t’i shqiptojë një pezullim deri në tre ndeshje për shkelje të kodit bazë të sjelljes së lojtarëve, duke dëmtuar imazhin e sportit dhe veçanërisht të UEFA-s. Një dënim i ngjashëm iu dha bashkëkombasit të tij, Neymar, në vitin 2019, pasi kritikoi arbitrat kur Paris Saint-Germain u eliminua nga Manchester United.

Nëse ndëshkohet, ai do ta vuajë pezullimin sezonin e ardhshëm në Ligën e Kampionëve. Gjithashtu, sipas raportimeve të tjera, edhe gjestet e tij ndaj tifozëve të Atletico Madridit mund të sjellin sanksione, ashtu siç ndodhi me lojtarët e Real Madrid në të njëjtin stadium. Në atë rast, Kylian Mbappe, Dani Ceballos dhe Jude Bellingham u gjobitën, ndërsa vetëm Antonio Rudiger u pezullua pasi bëri një gjest kërcënues.