Ambasada e Shteteve të Bashkuara të Amerikës (ShBA) në Prishtinë ka kërkuar nga partitë politikë që të respektohet afati prej 30 ditësh për konstituimin e Kuvendit, i cili është përcaktuar në aktgjykimin e fundit të Gjykatës Kushtetuese.

Në një përgjigje për “RTV21”, ambasada amerikane ka vlerësuar se ky afat po ofron.

“Vërejmë se Gjykata Kushtetuese e Kosovës ka rekomanduar që Kuvendi të konstituohet brenda 30 ditëve nga vendimi i saj, dhe kjo datë po afrohet”, ka vlerësuar ambasada e ShBA-së.

Kjo ambasadë ka theksuar konstituimi i Kuvendit është përgjegjësi e lidershipit politik.

“Është përgjegjësi e liderëve politikë që ta konstituojnë Kuvendin dhe të formojnë një qeveri stabile, në përputhje me Kushtetutën”, është thënë në këtë përgjigje.

Sipas ambasadës, ShBA-ja pret që të bashkëpunojë me qeverinë e re.

“Shtetet e Bashkuara e kanë mbështetur për një kohë të gjatë zhvillimin demokratik të Kosovës dhe presin të punojnë me qeverinë e ardhshme për të avancuar stabilitetin, sigurinë dhe mirëqenien rajonale”, ka vlerësuar ambasada e ShBA-së.