Apostolova: Raporti i ri për Kosovën është në proces të hartimit

21 nëntor 12:45

Shefja e Zyrës së Bashkimit Evropian (BE) në Kosovë, Nataliya Apostolova, ka bërë me dije se raporti i ri për Kosovën, i cili do të mbulojë periudhën shkurt 2018 deri në janar 2019 është në proces të hartimit.

Ajo ka shprehur optimizëm se pas analizimit të të gjitha kontributeve, BE-ja do të ketë mundësinë që të prodhojë një raport gjithëpërfshirës i cili do t’i ndihmojë Kosovës në rrugën e saj evropiane.

Apostolova këto komente i ka bërë në takimin e fundit të Bordit të përbashkët bashkërendues për sundimin e ligjit, ku kanë marrë pjesë shefja e EULEX-it, Alexandra Papadopoulou, ministri i Drejtësisë, Abelard Tahiri, kryesuesi i Këshillit Gjyqësor të Kosovës, Nehat Idrizi dhe kryesuesi i Këshillit Prokurorial, Blerim Isufaj.

Apostolova ka përgëzuar autoritetet e Kosovës për përpjekjet e vazhdueshme për zbatimin e kritereve të Agjendës së Reformave Evropiane, të cilat kanë të bëjnë me sundimin e ligjit.

Ndërsa, ministri i Drejtësisë, Abelard Tahiri ka potencuar se “Agjenda e Drejtësisë 2020” ka qenë e domosdoshme në qëllim të adresimit të çështjeve konkrete, të identifikuara gjatë viteve të fundit brenda sistemit të drejtësisë.

“Një mekanizëm i këtillë koordinues do të ndihmojë në qasje më të shpejtë, më moderne dhe më kualitative në qëllim të ngritjes së efikasitetit. Në këtë mënyrë, kjo agjendë do të ndihmojë procesin e rishikimit funksional, duke krijuar hapësirë për diskutime të temave të mëdha që kërkojnë hulumtim më të madh dhe diskutim më të detajuar brenda grupeve punuese”, ka thënë Tahiri.

Lajme të sponsorizuara

Të fundit
Pavarësisht një viti tejet të trazuar për platformën sociale të…