Sipas gazetës  “NZZ am Sonntag”, Zvicra, ndryshe nga Bashkimi Evropian  (BE), nuk ka sanksionuar dy banka kineze për të cilat dyshohet se kanë ndihmuar Rusinë të anashkalojë sanksionet.

Këshilli Federal ka argumentuar se nuk kishte prova të marrëdhënieve biznesi midis kompanive zvicerane dhe bankave të përmendura kineze, duke e bërë kështu të panevojshëm ndalimin e transaksioneve, transmeton “albinfo.ch”. Megjithatë, hulumtimet tregojnë se negociatat e vazhdueshme për përditësimin e marrëveshjes së tregtisë së lirë me Kinën luajtën gjithashtu një rol në këtë abstenim të Zvicrës.

Departamenti Federal i Çështjeve Ekonomike (EAER) fillimisht ka rekomanduar miratimin e të gjithë paketës së 18-të të sanksioneve të BE-së, ndërsa Departamenti Federal i Punëve të Jashtme (FDFA) paralajmëroi për pasoja të mundshme për marrëdhëniet me Pekinin. Këshilli Federal më pas e ka hedhur poshtë propozimin e EAER-it.

Këshilltari Kombëtar (deputeti) i SP-së, Fabian Molina, ka kritikuar qeverinë për nënshtrimin e marrëdhënieve të saj me Kinën ndaj interesave ekonomike. Nga ana tjetër, eksperti i politikës së jashtme të FDP-së, Hans-Peter Portmann, e ka konsideruar vendimin e saktë.