Ylli i Kombëtares së Gjermanisë, Leroy Sane mbërriti në Stamboll me një pritje spektakolare, duke ndezur entuziazmin mes tifozëve. 29-vjeçari zbriti nga avioni privat në qytetin turk me një shall të Galatasarayit të varur me krenari rreth qafës. Me kontratën e tij me Bayern Munich që skadon në fund të muajit, Sane i bashkohet skuadrës turke si lojtar i lirë.

“Kisha shumë oferta, por Galatasaray më impresionoi më së shumti. Atmosfera, madhështia e klubit dhe dëshira që kishin për mua bënë diferencën. Jam shumë mirënjohës tifozëve që erdhën në këtë orë. Kjo do të thotë shumë për mua dhe mezi pres ndeshjen time të parë para tyre”, ka thënë Sane.

Anësori gjerman pritet të përfitojë një pagë neto vjetore deri në 15 milion euro në Stamboll. Ndërkohë, Bayern Munich thuhet se po kërkon disa zëvendësues, duke përfshirë spanjollin Nico Williams nga Athletic Bilbao, Rafael Leao nga AC Milan, Christopher Nkunku nga Chelsea dhe Bradley Barcola nga Paris Saint-Germain.