Shkruan: Fadil Maloku

Ose; në ç’drejtim mund të na shpjerë procesi i vazhdimit të bllokimit të Kuvendit? Shikuar me “doptrinë” një sociologu të institucioneve, krejt “skizofreninë politike” që është duke u lozur rreth konstituimit të organeve të Kuvendit, me siguri do e shpallnim pa fije dyshimi; si një proces të dështuar dhe disfunksional. Do e shpallnim edhe për shkakun e vazhdimit të gjitha atyre seancave të kota, ku nuk hetuam asnjë dobi tjetër përveç rritjes së pasigurisë strukturore dhe aktivizimit “online” të mekanizmave in formalë (grupet klanore, klientelizmi, rrjetet joformale, grupet klanore, etj.) që po i rrisin ambiciet egoiste për të “menagjuar” (lexo; kontrolluar!) gjithë procesin e konstituimit të legjislacionit në Kosovë…?! Pse po themi kështu? Sepse;
1. Po KULTIVOHET; Kontestimi i Legjitimitetit demokratik; ku bllokada seriozisht po e gërryen dhe cenon deri në “palcë” legjitimitetin dhe frymën e demokracisë përfaqësuese dhe po e pengon funksionimin e mekanizmit themeltar në ndarjen e pushteteve dhe debatit institucional:
2. Po USHTROHET; Minimi i nivelit të “aksioneve” politike ndaj institucioneve shtetërore, përmes rritjes graduale të mosbesimit qytetar ndaj sistemit:
3. Po AVANCOHET; Kultura e konfliktit mbi kulturën e kompromisit, si një pasuri e çmuar e demokracisë neoliberale;
4. Po DËRGOHET, sinjali i përjashtimit dhe jo ai negocimit, çka mund të ndikojë negativisht në frustrimin dhe në sjelljet e akterëve politikë dhe të publikut:
5. Po INSTRUMENTALIZOHET, vullneti qytetar duke u përpjekur që të krijohet ndjesia e (sh)fajësimit për rivalin politik;
6. Po INICOHET, mundësia e krijimit të konditave për një mobilizim të ri populist, ku subjektet aktuale politike mund edhe të “rrafshohen” në një të ardhme të afërt nga skena politike:
7. Po AKTIVIZOHET, cinizmi politik si një model negativ i pjesëmarrjes politike. Ku gjeneratat e reja (ajo e “tik tokut”) gjithë “dramën” e konstituimit të organeve të Kuvendit, mund ta përjetojnë si diçka të huaj dhe jashtë “orbitës” së tyre sociale…