Diplomati britanik, John Stewart Duncan, ka thënë në Gjykatën Speciale në Hagë se ndërkombëtarët nuk kishin dëshmi se në Kosovë ka pasur dhunë të organizuar.

“Ne nuk kemi pasur dëshmi se ka qenë dhunë e organizuar”, ka thënë ai gjatë dëshmisë së tij në mbrojtje të Hashim Thaçit dhe ish-krerëve të tjerë të Ushtrisë Çlirimtare të Kosovës.

Duncan, ish-këshilltari politik i ish-komandantit suprem të Forcave Aleate të NATO-s, Wesley Clark, ka thënë se informacionet i merrnin nga komandantët e KFOR-it.

Atij i është paraqitur një deklaratë e Clarkut, ku gjenerali amerikan thoshte se “dhuna duhet parë si spontane, sidomos në jug të Kosovës”.

Gjykatësi, duke përmendur se Clark ia atribuonte dhunën “krimit të organizuar”, e pyeti diplomatin britanik nëse pajtohej me deklaratën.

Duncan ka pohuar, duke shtuar diçka për të: “Ishte e bazuar në informacionin që na vinte nga komandantët e KFOR-it dhe burimet e tjera”.