Fansat e zjarrtë të Michael Jackson kanë mundësinë që të blejnë diçka më të prekshme sesa disqet e tij.

Muzika e këngëtarit të famshëm, Michael Jackson, vazhdon të frymëzojë! Por tani fansat e tij të zjarrtë kanë mundësinë që të blejnë diçka më të prekshme sesa disqet e tij: “Mercedes-Benz SL 600” që ‘mbreti i popit’ ngiste, një roadster luksoz i vitit 1999 me një histori unike dhe pamje elegante.

SL 600 e gjeneratës me kodin e brendshëm R129 u ble nga Jackson në vitin 1999, kur ai ishte i martuar me Debbie Rowe, dhe fuqizohet nga motori ikonik V12 6,000 cc me 394 kuaj fuqi.

Kjo SL e veçantë është e zezë dhe ka një sistem audio premium McIntosh, perfekt për të dëgjuar hitet e tij më të mëdha me intensitetin që meritojnë. Ka përshkuar rreth 150,000 kilometra dhe aktualisht ndodhet në Bocholt, North Rhine-Westphalia, në dispozicion për shitje nëpërmjet platformës mobile.de.

Pronari aktual e importoi makinën nga Shtetet e Bashkuara të Amerikës në vitin 2016 dhe e rindërtoi plotësisht mekanikisht nga “Mercedes”, ndërsa si pezullimi ashtu edhe katalizatori janë të rinj.

Sipas reklamës, makina po shitet “në gjendje të shkëlqyer”, me shitësin që premton një certifikatë TÜV pas blerjes.

Çmimi fillestar është vendosur në 59,000 euro dhe ka vend për negociata. Siç thuhet me humor në reklamë, “me një Moonwalk të mirë, lëvizjen e famshme të vallëzimit të Jackson, mund të ketë një zbritje shtesë”.