Aventura e Angel Di Marias te Benfica ka marrë fund. Anësori argjentinas kishte njoftuar tashmë se do të largohej nga klubi portugez pas Kupës së Botës për Klube, dhe tani lamtumira është zyrtare.

Eliminimi i Benficës nga gara shënoi fundin e përvojës së dytë me fanellën bardhekuqe për kampionin e botës 2022, i cili donte t’u thoshte lamtumirë tifozëve me një mesazh të publikuar në faqen zyrtare të klubit: “Gjithmonë e kam konsideruar këtë klub shtëpinë time! Benfica është dashuri e pastër”.

Pasi mbërriti për herë të parë në Lisbonë në vitin 2007 nga Rosario Central, Di Maria e vendosi veten si një nga sulmuesit më të mirë të krahut në Evropë, duke fluturuar drejt Real Madridit dhe duke filluar një karrierë plot suksese ndërkombëtare në Spanjë, Angli, Francë dhe Itali.

Në verën e vitit 2023, ai u kthye te Benfica për të mbyllur një rreth personal, duke ofruar cilësi, përvojë dhe lidership në fushë. Por tani është koha për një kapitull të ri, të fundit: 37-vjeçari do të kthehet në Rosario Central, klubi ku filloi gjithçka. Ai do të veshë përsëri fanellën e qytetit  të lindjes për të mbyllur një karrierë legjendare para popullit të tij.