Dogana e Kosovës ka suspenduar nga puna zyrtarin e arrestuar për dyshimin se ka kryer vepra penale.

Vendimi është marrë me të pranuar njoftimin zyrtar se i njëjti zyrtar është arrestuar në rastin “Brezovica”.

“Procedimi disiplinor do të vijojë për të shqyrtuar veprimet tjera disiplinore. Dogana e Kosovës mbështet dhe mirëpret veprimet ligjore që ndihmojnë në luftimin e korrupsionit dhe siguron publikun se nuk do të tolerojë veprime jo etike dhe jo ligjore në rangjet e veta”, ka njoftuar dogana.

Më tutje, Dogana e Kosovës ia ka rikujtuar opinionit publik se ka lansuar aplikacionin “eDogana”, i cili krahas mënyrave tjera mundëson raportimin e korrupsionit dhe kontrabandës në mënyrë krejtësisht anonime dhe të sigurt.