Kosova në prag të përvjetorit të pavarësisë

Shkruan: Florian Dushi

Në vend të atmosferës së festës dhe reflektimit shtetëror, Republika e Kosovës po hyn në këtë përvjetor nën hijen e dilemave të rënda politike, institucionale dhe shoqërore.

Qeveri e mbështetur nga një shumicë formale, por pa bilanc rezultatesh

Një shumicë e konsoliduar numerikisht por jo edhe politikisht, e ndërtuar nga një parti që në pesë vitet e kaluara të qeverisjes nuk ka prodhuar rezultatet e premtuara.

Mes pritjeve të larta dhe realitetit të zymtë, hendeku mbetet i dukshëm – si në zhvillimin ekonomik, ashtu edhe në forcimin e institucioneve dhe përmirësimin e mirëqenies qytetare në përgjithësi.

Qeveri – produkt i një narrative që dikur mohonte shtetin

Paradoksi politik bëhet edhe më i theksuar kur pushteti ushtrohet nga një subjekt që ngritjen e vet e ndërtoi mbi retorikën e mohimit të shtetit, simboleve të tij.

Transformimi i tillë nuk është problem në vetvete nëse shoqërohet me reflektim e përgjegjësi; por kur ai shihet si oportunizëm politik, ushqen cinizëm dhe ndarje të reja në shoqëri.

Izolim, destabilitet dhe krizë besimi

Kosova po përballet me:

• Izolim ndërkombëtar në rritje,

• Destabilitet politik e institucional,

• Krizë ekonomike që rëndon mbi përditshmërinë e qytetarëve,

• Antagonizma të thella shoqërore, të ushqyera nga një propagandë e kushtueshme dhe polarizuese e udhëhequr nga partia në pushtet.

Në vend të unitetit rreth interesit shtetëror, vendi mbetet i mbërthyer në tensione të vazhdueshme dhe në një klimë mosbesimi mes subjekteve politike.

Procesi në Gjykatën e Hagës dhe hija mbi luftën çlirimtare

Gjykata e Specializuar në Hagë, një mekanizëm që u themelua nën peshën e një akuze publike të çmendur – dyshimet për trafikim organesh – sot perceptohet nga shumëkush si një mekanizëm i devijuar nga qëllimi i saj fillestar.

Rreziku nga mënyra se si procesi është duke u zhvilluar pranë kësaj gjykate nuk është vetëm juridik, por historik dhe moral: që narrativa mbi luftën për liri të relativizohet, duke goditur vetë themelet e shtetësisë së Kosovës.

Përvjetorët e pavarësisë nuk janë vetëm ditë feste. Janë momente bilanci e reflektimi nga secili prej nesh varësisht nga përgjegjësitë publike që kemi.

Bilanci i sivjetmë kërkon më shumë se retorikë: kërkon reflektim, përgjegjësi dhe rikthim tek parimet themelore të demokracisë, legjitimitetit dhe interesit qytetar e shtetëror.

Kosova 2026