Nideruzwil: Fëmijët shqiptarë mbajnë gjallë gjuhën dhe kulturën amtare

Nideruzwil, St. Gallen – Në diasporë, dashuria për gjuhën shqipe dhe trashëgiminë kulturore shqiptare po ruhet me fanatizëm nga brezi i ri. Këtë dëshmon edhe puna e palodhshme që po bëhet në kuadër të Lidhjes së Arsimtarëve dhe Prindërve Shqiptarë (LAPSH), në pikën shkollore të Nideruzwil-it.Ashtu si çdo vit, edhe këtë vit interesimi i prindërve për t’i dërguar fëmijët e tyre në shkollën shqipe ka qenë shumë i madh. Merita i atribuohet mësueses Hanife, e cila me përkushtimin e saj të madh ndaj gjuhës dhe kulturës shqiptare bën që klasa të jetë gjithmonë e mbushur me nxënës.Mësimi zhvillohet çdo të mërkurë, nga ora 13:40 deri në 15:15, dhe përfshin njohuri të vlefshme mbi gjuhën shqipe, historinë, kulturën dhe traditat e kombit tonë.
“Falënderoj të gjithë prindërit për interesimin e madh dhe gatishmërinë që fëmijët e tyre të jenë pjesë e mësimit plotësues në gjuhën shqipe. Është kënaqësi të shohim që ata e ruajnë me krenari gjuhën dhe identitetin tonë,” shprehet mësuesja Hanife.
Një mirënjohje e veçantë shkon për Rejhana Rashitin, falë përkushtimit të së cilës këtë vit numri i nxënësve është trefishuar.
Prindërit e pranishëm në këtë pikë shkollore ftojnë edhe të tjerët që t’u bashkohen, në mënyrë që sa më shumë fëmijë të përfitojnë nga kjo mundësi. Edhe vetë nxënësit, të shumtë në numër, dërguan një mesazh të qartë:
“Bashkohuni me ne në shkollën shqipe, që së bashku të mësojmë gjuhën, historinë dhe kulturën tonë të lavdishme!”

Prof. Gani Shala