Shefi i grupit parlamentar të Lidhjes Demokratike të Kosovës (LDK), Arben Gashi, u ka bërë thirrje deputetëve që ta votojnë Ligjin për buxhetin e Kosovës për 2021.

Ai në llogarinë e vet në “Facebook ka shkruar se votimi i këtij ligji nënkupton stabilitet financiar për vendin në kohën kur pritet shpallja e datës së zgjedhjeve të reja parlamentare.

Postimi i plotë i Gashit:

Nesër në ora 11:00 është në procedurë Ligji mbi ndarjet buxhetore për buxhetin e Kosovës për vitin 2021, si dhe disa marrëveshje ndërkombëtare shumë me interes për Kosovën.

Këto ligje tashmë nuk janë ligje për një qeveri apo për një koalicion qeverisës; nesër votohet për stabilitetin financiar të vendit.

Është përgjegjësi e secilit deputet dhe grup parlamentar që përtej interesit politik ditor, ta vendos stabilitetin ekonomik dhe financiar të vendit.

Muajt në vazhdim do të karakterizohen nga një krizë e thellë institucionale – kërkohet përgjegjësi dhe pjekuri politike nga ne!

LDK është e gatshme t’i marrë përgjegjësitë që i takojnë!