Njohësi i çështjeve ekonomike, Safet Gërxhaliu, ka paralajmëruar se qytetarët e Kosovës do të përballen sërish me rritje të tarifave të energjisë elektrike në janar të vitit 2025, si pasojë e tarifës së dioksidkarbonit, e cila pritet të ndikojë drejtpërdrejt në çmimin përfundimtar që paguajnë konsumatorët.

Ky paralajmërim vjen në një periudhë kur vendi po përjeton një situatë të rënduar ekonomike, pas rritjes së tarifave të energjisë elektrike prej 16.1 për qind për të gjithë konsumatorët dhe liberalizimit të tregut të hapur energjetik, që kanë sjellë një efekt zinxhir në shtrenjtimin e pothuajse të gjitha produkteve në treg.

“Në janar do të kemi shtrenjtim sërish shkak tarifa e dioksidkarbonit…”, ka thënë Gërxhaliu për “RTV21”.

Sipas të dhënave të Agjencisë së Statistikave të Kosovës, vetëm në muajin shtator çmimi i energjisë elektrike është rritur me 17.4 për qind, ndërsa inflacioni ka arritur në 4.7 për qind.

Ekspertët e ekonomisë kanë vlerësuar se mungesa e institucioneve legjitime, të afta për të mbikëqyrur vendimet që ndikojnë drejtpërdrejt në standardin e qytetarëve, ka thelluar edhe më shumë pasigurinë ekonomike.

Kushtrim Ahmeti, drejtor i Dhomës së Tregtisë, ka thënë se pasojat e vendimit për shtrenjtimin e energjisë dhe liberalizimin e tregut energjetik tashmë po i ndjejnë më shumë se 1 300 biznese, të cilat janë detyruar të dalin në tregun e hapur.