Në vitin 2022, kur në pistë zbritën makinat e reja të Formula 1, skuadra Red Bull ishte ajo që kishte projektin më të mirë. Rezultatet e dy viteve të fundit e konfirmojnë këtë gjë, teksa mjaft skuadra e kopjojnë makinën austriake.

Nuk është dakord me këtë ide Lewis Hamilton, që i qëndron besnik modelit që Mercedesi ka pasur dy sezonet e fundit. Shtatë herë kampioni i botës sqaron se duke kopjuar Red Bullin nuk mund të fitosh dhe nuk është zgjidhja e duhur për të dalë nga vështirësitë.

“Mjafton të shihni atë që i ndodhi Aston Martin. U përpoqën të kopjojnë Red Bull dhe në një moment të sezonit makina e tyre nuk arrinte të funksiononte. Duke kopjuar del gjithnjë i dyti”, ka deklaruar Hamilton.

“Nuk mund të hedhësh poshtë një projekt dhe të nisësh një tjetër nga fillimi. Duhet të përpiqesh të identifikosh atë që funksionon dhe të vazhdosh në zonat e tjera që kanë probleme. Ne kemi mjaft diferenca me Red Bull, sidomos në shpejtësinë maksimale dhe kjo është rruga ku duhet të punojmë”, ka shtuar Hamilton.