Shtetet e Bashkuara të Amerikës (ShBA) nuk e mbështesin as “Shqipërinë e Madhe” dhe as “Serbinë e Madhe”.

Këtë qëndrim në emër të Uashingtonit e ka dhënë të mërkurën në Prishtinë, ambasadori amerikan, Jeffrey Hovenier në një takim me gazetarë.

Sipas tij, ShBA-ja e përkrah integritetin territorial dhe sovranitetin e çdo shteti në Ballkanin Perëndimor.

Ky reagim i diplomatit vjen pas zhvillimeve që pasuan vizitën e kryeministrit Albin Kurtit, në Maqedoninë e Veriut, e cila ka nxitur reagime të bartësve të institucioneve për shkak të disa simboleve që promovonin shtetin etnik të shqiptarëve.