Dëshmitari James Peter Covey ka mohuar në Hagë se ka dijeni për rolin që kanë pasur Azem Syla dhe Sokol Bashota në Ushtrinë Çlirimtare të Kosovës (UÇK).

Këtë përgjigje, dëshmitari e dha duke u përgjigjur në pyetjet e prokurores Vega Iodice.

Dëshmitari ka thënë se nuk e ka ditur se kur është shfaqur për herë të parë UÇK-ja. Ngjahsëm ai është përgjigjur edhe kur është pyetur për rregulloret e UÇK-së.

“Nuk besoj”, është përgjigjur dëshmitari kur u pyet se a ka dijeni për ndonjë urdhër të UÇK-së.

Veç kësaj, Covey ka mohuar se ka dijeni për ndonjë shkëmbim të të burgosurve në janar të vitit 1999.

“Jo! Nuk kam dijeni. Në atë kohë nuk kam qenë i përfshirë në këtë. Kam punuar në Universitetin e Mbrojtjes Kombëtare”, ka thënë ndër tjerash dëshmitari duke treguar se ka punuar në një libër që do shfrytëzohej për efiçencë të armëve, raporton Betimi për Drejtësi.

“Nuk isha i përqendruar në ngjarjet në Kosovë. Nuk i kam ndjekur siç i kam ndjekur kur kam punuar në Këshillin e Sigurisë Kombëtare. Kështu që jo është përgjigja se nuk kam dijeni”, ka thënë dëshmitari Covey.