Deputetja e AAK-së, Time Kadrijaj, ditë më parë ka dorëzuar në Gjykatën Kushtetuese kërkesën për interpretimin  e Kushtetutës mbi procedurat dhe zvarritjen për zgjedhjen e kryetarit të Kuvendit.

Kadrijaj ka thënë se presin nga Gjykata Kushtetuese që lënda të trajtohet me seriozitet dhe të vendoset një afat kohë për konstituimin e Kuvendit ashtu siç është e përcaktuar edhe për formimin e qeverisë.

“Kur e kam dorëzuar kërkesën në Gjykatën Kushtetuese kam kërkuar që të trajtohet me urgjencë lënda për shkak të bllokadës politike. Ndoshta është një rast unik që gjykata mundet me i dhënë zgjidhje kësaj çështje edhe për punën e trajtimit apo kohëzgjatjes së sa një parti politike ka të drejtë ta shfrytëzoj të drejtën e kandidimit të një kandidati edhe nëse nuk i merr votat sepse mundet në pafundësi të bëjë bllokada të tilla. Kryeparlamentari votohet me një marrëveshje politike, me një koalicion politik. Asnjëherë nuk ka ndodh që kryetarin e Kuvendit ta votojnë partitë e tjera që nuk kanë një marrëveshje politike. Kjo se çfarë po kërkon LV-ja nuk ka sens. Nuk e kemi obligim me votuar asnjë kandidat. Por, megjithatë ne e kemi dhënë një alternativë për hir të Kosovës dhe jo të LVV-së që të dalim nga bllokada politike. Shpresojmë që Gjykata Kushtetuese shpejtë të kthej një përgjigje. Por, shpresojmë se do i trajtoj me seriozitet çështjet ku kemi ngelë. Nuk i gjykoj vendimet e Gjykatës Kushtetuese sepse ne i respektojmë, por ndoshta ta precizoj një afat kohorë sikurse është për formimin e qeverisë”, ka thënë Kadrijaj për “RTV21”.

Më tutje, deputetja Kadrijaj ka kritikuar edhe udhëheqësin e seancës konstituive Avni Dehari.

“Ne kemi filluar një proces me votim të hapur tash po kërkohet të kalohet në një proces të mbyllur kjo po mendoj se është një lojë e LV-së sepse edhe po të votohet ai komision, ne si deputetë nuk do të marrim pjesë fare në votim dhe prapë rezultati do te jetë i njëjtë. Kjo është një lojë që po e përdorë LVV-ja. Por edhe nëse votohet kryeparlamentari, LVV-ja do të bëhet lojë edhe me zgjedhjen e nënkryetarëve të Kuvendit”, ka thënë deputetja e AAK-së.