Kryeministri i Kamboxhias, Hun Manet, tha të enjten se e ka nominuar Presidentin e SHBA-së, Donald Trump, për Çmimin Nobel për Paqen, duke lavdëruar “aftësinë e tij të jashtëzakonshme shtetërore” në ndalimin e një konflikti kufitar midis Kamboxhias dhe Tajlandës, njofton Reuters.

Hun Manet e bëri njoftimin në një postim në Facebook të enjten vonë, të shoqëruar nga një letër që ai tha se i ishte dërguar Komitetit Norvegjez të Nobelit, duke përshëndetur ndërhyrjen e Trump si një shembull të “arritjeve të tij të jashtëzakonshme në uljen e tensioneve në disa nga rajonet më të paqëndrueshme të botës”.

“Kjo ndërhyrje në kohë, e cila shmangu një konflikt potencialisht shkatërrues, ishte jetike në parandalimin e një humbjeje të madhe jetësh dhe hapi rrugën drejt rivendosjes së paqes”, shkroi udhëheqësi kamboxhian në letër.

Ishte një telefonatë e 26 korrikut nga Trump me udhëheqësit e Tajlandës dhe Kamboxhias që theu bllokimin në përpjekjet për t’i dhënë fund disa prej luftimeve më të ashpra midis fqinjëve në historinë e kohëve të fundit.

Kjo çoi në një armëpushim të negociuar në Malajzi më 28 korrik. Të dy vendet ranë dakord të enjten të sigurojnë që të mos ketë rifillim të armiqësive dhe të lejojnë vëzhgues nga Azia Juglindore.