Kim Jong-un u ka bërë homazhe ushtarëve të Koresë së Veriut të vrarë gjatë luftës së Rusisë me Ukrainën, duke i mbështetur duart mbi arkivolet e tyre të riatdhesuar, në një pranim të rrallë publik se forcat e tij të armatosura kanë pësuar viktima në konflikt.

Fotografitë e udhëheqësit të Koresë së Veriut duke u ndalur para një rreshti prej gjysmë duzine arkivolesh të mbështjellë me flamurin e vendit u shfaqën në një ekran në një ngjarje të mbajtur të dielën për të shënuar përvjetorin e parë të një traktati ushtarak midis Veriut dhe Rusisë, shkruajnë mediat e huaja.

Ngjarja në Teatrin e Madh të Pyongyang-ut Lindor kombinoi shfaqje nga artistë të Koresë së Veriut dhe rusë në vizitë me imazhe që festonin një pakt mbrojtjeje të ndërsjellë të rënë dakord nga Kim dhe presidenti rus, Vladimir Putin, në Pyongyang në qershor të vitit të kaluar.

Skenat që tregonin Kim-in dhe trupat e ushtarëve të rënë ndiqnin ato të trupave nga të dy vendet duke valëvitur flamujt e tyre kombëtarë.

Një imazh thuhet se tregonte faqe nga një fletore e njollosur me gjak, që besohet se i përkiste një ushtari të Koresë së Veriut, që ishte gjetur nga një fushë beteje në rajonin Kursk të Rusisë.

Sipas agjencisë së lajmeve Yonhap të Koresë së Jugut, mesazhet në fletore shkruanin: “Momenti vendimtar më në fund ka ardhur” dhe “Le ta luftojmë me guxim këtë betejë të shenjtë me dashurinë dhe besimin e pakufishëm që na është dhënë nga Komandanti ynë i dashur Suprem” – një referencë për Kim.

Nuk ishte menjëherë e qartë se kur u zhvillua ceremonia e riatdhesimit. Kim dhe zyrtarë të tjerë, përfshirë motrën e tij me ndikim, Kim Yo-jong, dhe ministren e jashtme, Choe Son-hui, kanë veshur rroba dimërore, duke sugjeruar se eshtrat e ushtarëve mund të jenë kthyer në Veri disa muaj më parë.

Duke mohuar për muaj të tërë se ushtarët e Koresë së Veriut ishin dërguar për të luftuar përkrah forcave ruse, regjimi tani po përpiqet t’i japë një kthesë pozitive përfshirjes së tij në konfliktin e Ukrainës.

“Koreja e Veriut ndoshta donte t’i paraqiste ushtarët e rënë jo vetëm si sakrifica, por si pjesë të një narrative fitoreje”, thotë Hong Min, një studiues i lartë në Institutin Korean për Unifikimin Kombëtar, për Yonhap. /Telegrafi/