Hetuesit e Inspektoratit Policor të Kosovës (IPK) kanë arrestuar një zyrtare policore, e dyshuar për veprën penale të “keqpërdorimit të pozitës apo autoritetit zyrtar”. Me vendim të prokurorit kompetent, asaj i është caktuar masa e ndalimit prej 48 orësh.

Sipas njoftimit zyrtar të IPK-së, bazuar në autorizimet ligjore, është rekomanduar edhe suspendimi i zyrtares, e cila ishte e angazhuar në Pikën e Kalimit Kufitar Glloboçicë, në kuadër të Drejtorisë Rajonale të Policisë Kufitare Lindje Kaçanik.

Sipa Sinjalit zyrtarja e arrestuar është Daniela Stankoviq.

Bazuar në veprimet e para hetimore, dyshohet se zyrtarja policore ka shfrytëzuar në mënyrë të paautorizuar bazën e të dhënave të Policisë Kufitare, për të verifikuar dhe regjistruar në sistem të dhënat e një qytetari shtetas i Republikës së Serbisë.

Sipas IPK-së, ky qytetar nuk ka qenë fizikisht i pranishëm në pikën kufitare në momentin kur është bërë verifikimi, ndërkohë që dyshimet janë se zyrtarja e ka kryer këtë veprim me qëllim për të parë nëse ai ndodhej apo jo në kërkim policor.

Hetuesit e IPK-së, në bashkëpunim me Prokurorinë Themelore në Ferizaj, kanë paralajmëruar se do të ndërmarrin veprime të tjera hetimore për të sqaruar plotësisht të gjitha rrethanat që lidhen me këtë rast.