Avokati Arianit Koci kritikon se aktgjykimi i Kushtetueses përdori terma të përgjithshëm si “mirëbesim” dhe “bashkëpunim” pa sqaruar qartë çfarë do të thonë në praktikë.

Ai thekson se mungesa e udhëzimeve konkrete dhe hapësira për interpretime të ndryshme rrisin rrezikun e vazhdimit të bllokadës politike nëse partitë nuk arrijnë marrëveshje.

Postimi i plotë:

Gjykata Kushtetuese e dha vendimin – por nuk e dha zgjidhjen.

Në vend që të fliste me standarde të qarta kushtetuese, përdori fjalë si “mirëbesim”, “bashkëpunim” dhe “fryma e Kushtetutës” – pa sqaruar se çfarë nënkuptojnë këto në rrethana konkrete.

Për më tepër, nuk tregoi qartazi se çka lejohet e çka ndalohet.

Madje, ka hapësirë për interpretim edhe si duhet proceduar tutje, nëse Kuvendi nuk konstituohet brenda afatit 30-ditor.

Në një klimë politike ku çdo nen, çdo rregull dhe çdo fjali interpretohet sipas interesit të partiak – termat dhe vendimet e tilla nuk e zgjidhin problemin.

Dhe si pasojë – nëse partitë nuk arrijnë marrëveshje politike, bllokada do të vazhdojë.