Më 12 maj, bëhen fiks një vit që nga aplikimi zyrtar i Kosovës për t’u anëtarësuar në Këshillin e Evropës.

Deri tashti, çështja e Kosovës nuk është futur në agjendën e këtij Këshilli. Isuf Halimi, drejtor në Qendrën Evropiane për të Drejtat e Njeriut në Strasburg, ku është edhe selia qendrore e Këshillit të Evropës, ka thënë se “Kosova nuk është fare në agjendën e takimi të Ministrave të Këshillit të Evropës që do mbahet me 16 dhe 17 maj”.

Halimi ka thënë se si organizatë jo qeveritare, mundohen që ta shtyjnë çështjen e Kosovës përpara, për ta futur në agjendë. Sipas tij, deri tani kanë pasur mbi 80 takime me akterë të ndryshëm në sferën e lobimit në të mirë të Kosovës.

Por, Halimi, në “Sytë 7” në “Klan Kosova”, ka thënë se “Qeveria e Kosovës nuk ka një plan të veprimit, karshi futjes në agjendë”. Sipas tij, janë dy-tre persona që merren me këtë çështje në emër të Kosovës, por janë tejet të mbyllur dhe nuk tentojnë bashkëpunimin me akterët kosovar e shqiptar që gjenden atje, e sidomos me shoqërinë civile e cila ka një impakt të lartë.

Ai është skeptik se këtë vit Kosova mund të anëtarësohet në KE, ndonëse thotë se mund të ketë ndonjë befasi, e cila mund të merret vesh deri në Qershor, kur ka gjasë të futet në agjendë.

Drejtori i Qendrës Evropiane për të Drejtat e Njeriut, ka bërë me dije se mediat franceze fare s’janë të interesuar për të raportuar mbi situatën e Kosovës dhe Ballkanit në raport me Evropën. Ndërsa, shteti i Spanjës, mbetet më hezituesi për pranimin e Kosovës në Këshillin e Evropës.