Toni Kroos ka minimizuar tensionet e fundit mes tifozëve të Real Madridit dhe Vinicius Juniorit, duke dhënë një deklaratë që ka ngjallur reagime të shumta: “Një lojtar që nuk është fishkëllyer në Bernabeu nuk është lojtar i madh”.

Tifozët madrilenë u shfaqën tepër kritikë gjatë fitores së vështirë ndaj Levantes në La Liga, me Vinicius Jr që u bë shënjestër kryesore e fishkëllimave. Sulmuesi brazilian reagoi pas disa ditësh të vështira, duke theksuar se dëshiron të gjykohet vetëm për atë që jep në fushë, sidomos pas paraqitjes së shkëlqyer në Ligën e Kampionëve ndaj Monacos, ku pati ndikim direkt në katër nga gjashtë golat e Realit.

Në mbështetje të Viniciusit dolën edhe yjet e tjerë të skuadrës. Jude Bellingham reagoi me një festim domethënës, ndërsa Kylian Mbappé ishte i drejtpërdrejtë:
“Nëse do të ketë fishkëllima, ato duhet të jenë për gjithë ekipin. Nuk duhet të veçohet një lojtar i vetëm. Po luajmë dobët si skuadër, por kemi karakter për ta ndryshuar situatën”.

Kroos, në podcastin e tij “Einfach mal Luppen”, shkoi edhe më tej, duke e cilësuar kritikën ndaj Viniciusit si një shenjë respekti për statusin e tij:
“Ata rrallë kritikojnë lojtarë të vegjël. Emrat e mëdhenj janë gjithmonë në shënjestër, për mirë ose për keq”.

Gjermani pranoi se kjo nuk është mënyra më e mirë për të ndihmuar ekipin, por është realiteti i Real Madridit: “Kur fishkëllimet nisin që para ndeshjes, nuk është e lehtë të fitosh dhe të luash mirë. Por e vetmja rrugëdalje janë rezultatet, qëndrimi dhe loja”.

Pakënaqësia e tifozëve nuk ka ardhur pa arsye. Vetëm tre ditë para ndeshjes me Levanten, Reali u eliminua në mënyrë befasuese nga Kupa e Mbretit pas humbjes 3–2 ndaj Albacetes, skuadër e kategorisë së dytë.

Kroos kujtoi edhe një episod të ngjashëm nga e kaluara: eliminimin ndaj Alcoyanos në vitin 2021, kur Reali humbi ndaj një ekipi të kategorisë së tretë, por më pas fitoi La Ligën.

“As ajo gjeneratë e artë nuk ishte perfekte. Edhe ne kemi kaluar periudha të vështira”, përfundoi ai.

Mesazhi i Kroosit është i qartë: presioni në Real Madrid është pjesë e ADN-së së klubit, dhe vetëm ata që dinë ta përballojnë, mund të quhen vërtet lojtarë të mëdhenj.