Për nder të 28 Nëntorit – Ditës së Pavarësisë së Shqipërisë, më 29 dhjetor 2025 në Abtwil të kantonit St. Gallen, u mbajt një manifestim festiv nën organizimin e LAPSH-it “Naim Frashëri” dhe Studios Artistike “Feniks”. Motoja që udhëhoqi këtë mbrëmje të paharrueshme ishte:

“Kuq e Zi janë ngjyrat tona.”

Skena mori jetë kur të gjithë nxënësit, dhe valltarët e Studios artistke „Feniks“,të veshur me kostume kombëtare shqiptare, u paraqitën me krenari para publikut. Ngjyrat, motivet tradicionale dhe buzëqeshjet e tyre krijuan një atmosferë magjike që i ngriti të pranishmit në këmbë. Sallën e pushtuan duartrokitjet e gjata, të cilat kulmuan në këndimin e himnit kombëtar nga nxënësit dhe pjesëmarrësit.Programi u hap nga moderatorja Rina Byligbashi, e cila theksoi se shqiptarët, kudo që ndodhen, e kanë për nder dhe obligim të bashkohen në këtë ditë të madhe kombëtare – jo vetëm për të festuar lirinë, por për të përkujtuar me mirënjohje të gjithë ata që me gjakun e tyre i dhanë jetë pavarësisë.Më pas, fjalën e mori mësuesi Gani Shala, i cili u shpreh:“28 Nëntori është dita e krenarisë, e sakrificës dhe e dashurisë për atdheun. Është dita kur flamuri kuq e zi u ngrit për herë të parë si simbol i lirisë dhe unitetit. Ju ftoj me gjithë zemër t’i dërgoni fëmijët në shkollën shqipe, sepse gjuha shqipe është gjuha e zemrës.”Mësuesja Afërdita iu drejtua të pranishmëve me fjalë emocionuese:“28 Nëntori është gur themeli i historisë sonë kombëtare. Kjo ditë na kujton shpalljen e Pavarësisë më 1912 nga Ismail Qemali në Vlorë. Po ashtu, na kujton ditëlindjen e Komandantit legjendar Adem Jashari dhe daljen publike të Ushtrisë Çlirimtare të Kosovës – emra dhe ngjarje që mishërojnë heroizmin dhe lirinë e shqiptarëve.”Në emër të LAPSH-it “Naim Frashëri”të pikës shkollore Niderzei, znj. Rejhana Reshiti shprehu mirënjohjen e saj ndaj organizatorëve dhe prindërve për përkrahjen e pashtershme:“Detyra jonë është të përhapim dritën e diturisë në gjuhën e nënës. Mësimi i gjuhës amtare nuk është luks, por domosdoshmëri dhe mbi të gjitha, obligim kombëtar.”Një moment i paharrueshëm i mbrëmjes ishte interpretimi i valleve me mjeshtëri nga Studio artistike „Feniks“ e cila ndezi sallën me emocione të fuqishme.Veprimtari, poeti dhe publicisti i njohur Isuf Sherifi përshëndeti organizatorët duke vlerësuar punën e tyre të palodhshme. Isuf Sherif ka një veprimtari të gjerë kulturore dhe letrare, ai vazhdon të kontribuojë në prezantimin e poezisë shqipe në Zvicër.Atmosfera u ndez edhe më shumë me performancën e vajzave dhe djemve të Studios Artistike “Feniks”. Tingujt e valleve dhe lëvizjet plot energji sollën në skenë shpirtin e gjallë të traditave shqiptare. “Feniksi” mbetet simbol i ruajtjes së vlerave autentike, vendi ku kultura jonë merr frymë, rritet dhe bashkon zemrat shqiptare.

Me daljen në skenë të nxënësve të mësimit plotësues, skena u mbush me ngjyrat e flamurit. Ata recituan vjersha për Atdheun dhe gjuhën shqipe, nën drejtimin e mësueseve Afërdita Maliqi, Hanife Adili dhe mësuesit Gani Shala. Në zërat e tyre ndjehej qartë dashuria e pastër për flamurin kuq e zi – një dashuri që mbijeton larg atdheut.Nëpërmjet këtij manifestimi, nxënësit u bënë thirrje prindërve që t’i dërgojnë fëmijët në shkollën shqipe, për të ruajtur me fanatizëm kulturën, traditën dhe gjuhën tonë të bekuar.Pas kësaj pjese, skena iu dha këngëtarit të mirënjohur të këngës burimore, Bexhet Sallai, i cili me interpretimin e tij i dha manifestimit një tjetër jetë dhe tingull shpirtëror.Në përmbyllje, moderatorët Rina Byligbashi, Hafsa Muharremi, Loran Reshiti dhe Elina Adili – të cilat e mbajtën programin me një gjuhë të pastër e me një prezantim shembullor – u duartrokitën gjatë nga publiku.Këshilli Organizativ e nderoi Studion Artistike “Feniks” me një dhuratë modeste, në shenjë mirënjohjeje për kontributin e tyre të çmuar në ruajtjen e traditave kombëtare.

Manifestimi u mbyll me urimin solemn:

“Urime 28 Nëntori – Dita e Flamurit, për të gjithë shqiptarët, kudo që ndodhen!

Gëzuar, dhe mirë u takofshim në programet dhe manifestimet e ardhshme!”

29.11.2025
Abtwil
Prof. Gani Shala