Kryeministri në detyrë Albin Kurti, ka marrë pjesë në takimin e liderëve të Ballkanit Perëndimor mbi Planin e Rritjes, të mbajtur në Shkup të Maqedonisë së Veriut, me moton “Stabiliteti, Uniteti dhe e Ardhmja”.

Kurti udhëtoi një natë më parë për të qenë pjesë e darkës me liderët rajonalë, të shtruar nga kryeministri nikoqir Hristijan Mickoski, ndërsa sot mori pjesë në panelin e parë të diskutimeve me temën “Plani i Rritjes: Vlerësim, puna e ardhshme dhe komunikimi”.

Në fjalimin e tij, Kurti vlerësoi Planin e Rritjes të BE-së si një hap të rëndësishëm për përshpejtimin e reformave dhe integrimit, duke kërkuar që mbështetja e Bashkimit Evropian të jetë në përputhje me përkushtimin e vendeve të rajonit për reforma demokratike dhe respektim të vlerave evropiane.

Ai nënvizoi nevojën që Kosova të ketë qasje të barabartë në programet dhe instrumentet e BE-së, përfshirë Konventën e Tranzitit të Përbashkët dhe organizatat për standardizim.

“Kemi nevojë për investime që lidhen me sigurinë ekonomike të BE-së dhe për fonde që reflektojnë nivelin tonë të reformave. Plani i Rritjes është më ambicioz se IPA, por nevojiten më shumë mjete për të arritur nivelet e vendeve si Kroacia,” tha Kurti, duke përmendur se vendet e Ballkanit Perëndimor kanë marrë shumë më pak fonde për frymë në krahasim me Kroacinë gjatë viteve të fundit.

Tutje theksoi progresin e Kosovës që nga takimi i fundit në Kotor, përfshirë kryesimin e suksesshëm të CEFTA-s dhe miratimin e Planit të ri për Tregun e Përbashkët Rajonal.

Kurti gjithashtu përmendi vendimin e Kosovës për të lejuar udhëtimin pa viza për qytetarët e Bosnje dhe Hercegovinës, duke kërkuar reciprocitet për qytetarët e Kosovës.

Në drejtim të Planit të Rritjes, Kurti theksoi përkrahjen e Kosovës për sektorët si turizmi, mbrojtja e konsumatorit dhe “Autostrada e Tregut të Përbashkët”, por propozoi edhe fusha të reja për bashkëpunim rajonal: teknologjitë digjitale dhe inteligjenca artificiale, siguria kibernetike, bujqësia dhe mbrojtja.

Sipas tij zhvendosja e prodhimit (nearshoring) duhet të fokusohet tek partnerë të besueshëm, duke e konsideruar këtë si një mundësi të madhe edhe për BE-në.

Kurti përmendi gjithashtu nisma konkrete të ndërmarra nga Kosova si lansimi i portofolit digjital për identifikim elektronik, përparimi drejt integrimit në SEPA, funksionalizimi i pikave të përbashkëta kufitare me Maqedoninë e Veriut dhe Shqipërinë, dhe mbështetja për Marrëveshjen mbi Vlerësimin e Konformitetit të produkteve.

Në fund të fjalimit të tij, Kurti theksoi rëndësinë e sigurisë për rritjen ekonomike, duke theksuar se rajoni nuk është i izoluar nga zhvillimet gjeopolitike globale.