Kreu i Partisë “Partia e Lirisë” Ilir Meta vizitoi këtë të enjte familjen e Jonadës, vajzës 7-vjeçare që u vra me skaf nga polici Arjan Tase.

Meta u shpreh i tronditur nga ngjarja, ndërsa tha për gazetarët se Vrasja e vogëlushes është një papërgjegjshmëri totale, duke e cilësuar si vrasje të paralajmëruar.

Lexo edhe: “Vampirë politikë dhe mediatikë”, Berisha i kujton Ramës vdekjet e qytetarëve në komisariate dhe vrasjen e Klodian Rashës

“Tepër tronditëse për çdo familje dhe çdo prind, aq më tepër për familjen Avdia, për babain që e përjetoi atë tmerr aq pranë, për vëllain e vogël, për të gjithë, për gjyshin, i cili mezi e kishte pritur mbesën që ajo e kishte përmirësuar gjuhën shqipe. Është një rast i pangushëllueshëm. Jam i impresionuar nga forca dhe karakteri i kësaj familje.

Ishte një tragjedi që nuk ka justifikim nga askush. Jo vetëm nga autori i papërgjegjshëm, por edhe nga shteti, qeveria dhe bashkia, pasi ekziston një legjislacion për sigurinë në plazhe, i cili nuk është respektuar në elementë të tij.

Është një vrasje e paralajmëruar sepse kanë ndodhur raste të tilla edhe më parë. Para pak kohësh kanë ndodhur plagosje që për fat të mirë pa pasoja në vdekje dhe askush nuk e ka vënë ujin në zjarr. Një papërgjegjshmëri totale. Në një moment duhet të shfaqet pendesa, por edhe marrja e vendimeve të qarta, në të njëjtën moment na shpallet se Shqipëria qenë sivjet e para në rajon sa i takon sigurisë në plazhe dhe turizmit. Nuk ka tallje dhe fyerje më të madhe për popullin shqiptar”, ka thënë Meta. /abcnews.al/