Ministrat e punëve të brendshme të vendeve anëtare të NATO-s do të takohen të martën dhe të mërkurën në Bruksel.

Dita e dytë pritet t’i kushtohet Ballkanit Perëndimor dhe dialogu midis Kosovës dhe Serbisë pritet të jetë po ashtu temë e diskutimeve.

Shefi i NATO-s, Jens Stoltenberg, ka thënë të hënën se aleanca e mbështet plotësisht dialogun për normalizimin e marrëdhënieve midis Prishtinës dhe Beogradit.

“Është e rëndësishme që të gjithë lojtarët të përmbahen nga veprimet dhe retorika provokuese dhe të bëjnë përpjekje që t’i zvogëlojnë tensionet dhe të shënojnë përparim”, ka thënë Stoltenbergu.

“Sa i përket ndryshimit të mundshëm të kufijve, mund të them se ne e mbështesim dialogun dhe shpresoj se (palët) do të jenë në gjendje të gjejnë një zgjidhje të pranueshme si për Beogradin, ashtu edhe për Prishtinën”,ka thënë Stoltenbergu.

Ai ka theksuar se misioni paqeruajtës i NATO-s, KFOR, do të vazhdojë të jetë i pranishëm në Kosovë, për të ndihmuar në ruajtjen e stabilitetit dhe të sigurisë.

Ideja për ndryshim kufijsh është shpalosur nga presidentët e Kosovës dhe Serbisë, Hashim Thaçi dhe Aleksandër Vuçiq, si mundësi për zgjidhjen e problemeve midis dy vendeve.