Basketbollistët e New York Knicks arritën një fitore të madhe ndaj Indiana Pacers në udhëtim me rezultatin 106:100, duke ngushtuar serinë finale të Konferencës Lindore në 2-1.

Indiana synonte epërsinë 3-0 pas dy fitoreve në New York, çka do ta afronte shumë me finalen e madhe të NBA-së. Pjesa e parë shkoi sipas planit për Pacers, të cilët ndërtuan një avantazh prej 20 pikësh në fund të çerekut të dytë (55:35). Edhe në çerekun e katërt Indiana kishte një epërsi të konsiderueshme prej 10 pikësh (80:70), por gjithçka ndryshoi në minutat e fundit.

Karl-Anthony Towns shkëlqeu në çerekun e fundit, duke shënuar 20 pikë dhe duke udhëhequr rikthimin spektakolar të Knicks. Towns e mbylli ndeshjen me 24 pikë dhe 15 kërcime, ndërsa Jalen Brunson shtoi edhe 23 pikë për skuadrën nga New Yorku. Te Indiana, më efikasit ishin Tyrese Haliburton me 20 pikë dhe Miles Turner me 19. Edhe ndeshja e katërt zhvillohet në Indiana, teksa vendasit synojnë fitoren e tretë dhe mysafirët duan të barazojnë gjithçka.