Presidenti i Shteteve të Bashkuara të Amerikës, Donald Trump, mbërriti këtë pasdite në Teksas, shtetin e goditur rëndë nga përmbytjet katastrofike që morën jetën e të paktën 135 personave.

Vizita e Trump në Teksas vjen një javë pas tragjedisë që tronditi vendin dhe në një kohë kur kritikat ndaj autoriteteve lokale dhe federale janë shtuar për përgjigjen e dobët ndaj krizës.

I shoqëruar nga bashkëshortja e tij, Melania Trump, presidenti zhvilloi një vizitë disaorëshe në zonat më të goditura, ku takoi zyrtarë lokalë dhe familje të prekura nga fatkeqësia.

“Nuk kam parë kurrë diçka të tillë më parë. Është e vështirë të besohet shkatërrimi,” u shpreh Trump gjatë takimit me autoritetet vendore. “Pemë 100-vjeçare të shkulura nga rrënjët… shumë fëmijë janë të zhdukur.”

Nga ana e saj, Melania Trump shprehu ngushëllimet e saj për familjet e viktimave: “Ngushëllimet e mia më të thella për të gjithë prindërit që humbën fëmijët e tyre të vegjël”, theksoi ajo.

“Ne vajtojmë me ju. I gjithë vendi ynë vajton me ju”, tha Melania.

Sipas të dhënave të fundit, mbi 170 persona mbeten ende të zhdukur, ndërsa Qarku Kerr është zona më e prekur me 96 viktima, prej të cilëve 36 fëmijë.

Përmbytjet u shkaktuan nga reshje ekstreme më 4 korrik, kur reshjet e dendura përfshinë Teksasin Qendror në orët e para të mëngjesit, duke zënë shumë banorë në befasi.

Vizita e Trump vjen në mes të polemikave mbi reagimin ndaj katastrofës dhe rolin e Agjencisë Federale për Menaxhimin e Emergjencave (FEMA). Administrata Trump është kritikuar për shkurtimet buxhetore në sistemet e paralajmërimit të hershëm dhe kapacitetet e shërbimeve të emergjencës.

Kur u pyet nga gazetarët nëse synon ende shfuqizimin e FEMA-s, Trump u përgjigj se “nuk është koha e duhur” për ta diskutuar këtë çështje, ndonëse më herët ka deklaruar se menaxhimi i fatkeqësive duhet të jetë përgjegjësi e shteteve.

Megjithatë, presidenti shpalli gjendjen e jashtëzakonshme në Teksas për të lejuar ndërhyrjen federale dhe për të çliruar burime emergjente. Sekretarja e Sigurisë

Kombëtare, Kristi Noem, deklaroi përmes një postimi në Platformën X (ish-Tëitter) se “përgjigja federale ishte e shpejtë dhe efektive.”

Vend në zi dhe në pritje të përgjigjeve

Ndërsa ekipet e kërkim-shpëtimit vijojnë operacionet në zonat e përmbytura, familjet e viktimave dhe të zhdukurve presin përgjigje.

Vizita e Trump synon të tregojë solidaritetin e Shtëpisë së Bardhë me Teksasin, por gjithashtu ka vënë në qendër të debatit kapacitetin real të strukturave shtetërore për t’u përballur me fatkeqësi të kësaj përmase.