Presidenti i Partisë së Lirisë, Ilir Meta, ka publikuar një audiomesazh, ku thotë se shqiptarët si kurrë më parë do të bashkohen në kutitë e votimit “për të dërrmuar – siç thotë ai – sektin më të pabesë që shpopulloi vendin”.

Meta shprehet se “Partia e Lirisë ka një rol historik për të luajtur më 11 Maj dhe për të kontribuar për rotacionin më të rëndësishëm që nga 22 Marsi 1992”.

Sipas tij, ‘më 11 Maj me votën tonë arkivojmë përgjithmonë klimën armiqësore ndaj biznesit dhe sipërmarrjes dhe çelim një perspektivë fantastike duke garantuar klimën më miqësore ndaj biznesit’.

“Me fjalët e poetit të pavdekshëm, Havzi Nelës “O Liri, o vdekje” dhe me programin tonë shpëtimtar për çdo pensionist, për çdo familje shqiptare, për të rinjtë dhe për të rejat tona të vrapojmë drejt fitores së 11 Majit, që do t’i bashkojë shqiptarët si kurrë më parë rreth interesit kombëtar dhe interesit publik, rreth Kushtetutës dhe së ardhmes europiane”, tha Meta.