Sekretari i përgjithshëm i Kombeve të Bashkuara, António Guterres, ka kërkuar një hetim të menjëhershëm dhe të pavarur për vrasjen e palestinezëve pranë një qendre të ndihmave në Rafah të Gazës të dielën, pas raporteve të kundërta mbi përfshirjen e forcave izraelite në incident.

Dëshmitarët thanë se janë qëlluar derisa prisnin ndihma ushqimore nga Qendra Humanitare e Gazës (GHF), e mbështetur nga SHBA dhe Izraeli.

Kryqi i Kuq njoftoi se ka pranuar 179 të plagosur, ndërsa 21 prej tyre kanë ndërruar jetë. Agjencia e Mbrojtjes Civile, e drejtuar nga Hamasi, e vendosi numrin e viktimave në 31, raporton BBC.

Ushtria izraelite mohoi akuzat duke thënë se forcat e saj nuk kanë hapur zjarr ndaj civilëve as pranë, e as brenda zonës së shpërndarjes së ndihmave, ndërsa raportimet i cilësoi si “të rreme”. Edhe GHF i hodhi poshtë akuzat, duke i quajtur “trillime të plota”, dhe tha se ende nuk ka parë prova për ndonjë sulm pranë objektit të saj.

Verifikimi i situatës në Gaza mbetet i vështirë, pasi Izraeli nuk lejon hyrjen e organizatave ndërkombëtare të lajmeve, përfshirë BBC-në.

“Jam i tmerruar nga raportet për palestinezë të vrarë e të plagosur ndërsa kërkonin ndihma në Gaza dje. Kërkoj hetim të menjëhershëm dhe të pavarur për këto ngjarje dhe që përgjegjësit të mbahen në llogari,” tha Guterres në një deklaratë të hënën.

Ministria e Jashtme e Izraelit reagoi ashpër ndaj deklaratës së tij, duke e cilësuar si “turp” dhe e kritikoi sekretarin e OKB-së që nuk përmendi Hamasin.