Opozitari iranian në mërgim, Princi i Kurorës Reza Pahlavi, e quan “mi të frikësuar” Liderin Suprem të Iranit, Ali Khamenei. Ai në një adresim popullit irianin, i bën thirrje që të mos sakrifikojnë vetën e tyre për një regjim në rënie.

Ai deklaron se “Republika Islamike ka arritur fundin e saj dhe është në proces të shembjes”.

“Fundi i Republikës Islamike është fundi i luftës së saj 46-vjeçare kundër kombit iranian”, deklaron tutje.

Sipas tij, e ardhmja është e ndritur duke u shprehur për një qeveri demokratike pas rënies së regjimit.

“Ne kemi një plan për të ardhmen e Iranit dhe lulëzimin e tij. Ne jemi të përgatitur për njëqind ditët e para pas rënies, për periudhën kalimtare dhe për krijimin e një qeverie kombëtare dhe demokratike—nga populli iranian dhe për popullin iranian”.

Adresimi i tij i plotë:

““Bashkatdhetarët e mi,

Republika Islamike ka arritur fundin e saj dhe është në proces të shembjes. Khamenei, si një mi i frikësuar, është fshehur nën tokë dhe ka humbur kontrollin e situatës. Ajo që ka filluar është e pakthyeshme. E ardhmja është e ndritur dhe së bashku do të kalojmë nëpër këtë kthesë të mprehtë në histori.

Në këto ditë të vështira, zemra ime është me të gjithë qytetarët e pambrojtur që janë dëmtuar dhe kanë rënë viktimë e nxitjes së luftës dhe iluzioneve të Khameneit. Për vite me radhë, jam përpjekur të parandaloj që atdheu ynë të konsumohet nga zjarri i luftës.

Fundi i Republikës Islamike është fundi i luftës së saj 46-vjeçare kundër kombit iranian.

Aparati i represionit të regjimit po shembet. E tëra çfarë duhet tani është një kryengritje mbarëkombëtare për t’i dhënë fund këtij makthi një herë e përgjithmonë.

Tani është koha për t’u ngritur; koha për të rimarrë Iranin. Le të dalim të gjithë përpara – nga Bandar Abbas në Bandar Anzali, nga Shiraz në Isfahan, nga Tabriz në Zahedan, nga Mashhad në Ahvaz, nga Shahr-e Kord në Kermanshah—dhe të sjellë fundin e këtij regjimi.

Mos kini frikë ditën pas rënies së Republikës Islamike. Irani nuk do të zhytet në luftë civile apo paqëndrueshmëri. Ne kemi një plan për të ardhmen e Iranit dhe lulëzimin e tij. Ne jemi të përgatitur për njëqind ditët e para pas rënies, për periudhën kalimtare dhe për krijimin e një qeverie kombëtare dhe demokratike—nga populli iranian dhe për popullin iranian.

Ushtrisë, forcave të zbatimit të ligjit, forcave të sigurisë dhe punonjësve shtetërorë—shumë prej të cilëve më kanë dërguar mesazhe ditët e fundit—u them: Mos u kundërviheni popullit iranian për hir të një regjimi, rënia e të cilit ka filluar dhe është e pashmangshme. Mos sakrifikoni veten për një regjim në rënie. Duke qëndruar me popullin, mund të shpëtoni jetën tuaj. Luani një rol historik në tranzicionin nga Republika Islamike dhe merrni pjesë në ndërtimin e së ardhmes së Iranit.

Një Iran i lirë dhe i lulëzuar shtrihet përpara nesh. Uroj të jemi së shpejti së bashku.

Rroftë Irani! Rroftë kombi iranian!.”, shkruan ai.