Shkruan: Ethem Çeku

Kosova po kalon një periudhë ku sfidat e brendshme dhe presionet e jashtme kërkojnë lidership të matur, të qëndrueshëm dhe të provuar. Në një realitet të tillë, vendi ka nevojë për figura që e njohin peshën e shtetit nga përvoja e drejtpërdrejtë dhe që marrin vendime në çaste kur guximi është domosdoshmëri. Ramush Haradinaj është një prej atyre liderëve që e ka shndërruar përvojën personale në përgjegjësi shtetërore.
Vendimmarrja e tij është formuar në momente kritike dhe autoriteti i tij buron nga veprimi, jo nga retorika. Forca e tij politike është rezultat i përballjes reale me sfidat e shtetit dhe i qëndrimit të pandryshuar në mbrojtje të interesit publik.
Në politikën ndërkombëtare, besueshmëria është aset vendimtar për vendet e vogla. Deklaratat e James Rubin dhe gjeneral Wesley Clark e rendisin Ramush Haradinajn ndër figurat më të respektuara të Kosovës në sytë e SHBA-së. Ai ka dëshmuar orientim të qartë strategjik dhe, me përkrahjen e Shteteve të Bashkuara, realizoi një prej akteve më të rëndësishme të shtetformimit , formimin e Ushtrisë së Kosovës.
Një vend në udhëkryq si Kosova kërkon liderë që nuk lëkunden. Ramush Haradinaj përfaqëson qëndrueshmërinë, seriozitetin dhe besnikërinë ndaj orientimit perëndimor të Republikës. Në një skenë politike ku shpesh dominojnë deklaratat e shpejta dhe lëvizjet impulsive, ai mbetet ndër të paktët që vepron mbi parim, përgjegjësi dhe qartësi.
Mbështetja për Ramush Haradinajn nuk është zgjedhje partiake; është zgjedhje për stabilitetin e shtetit, për vazhdimësinë e orientimit euroatlantik dhe për mbrojtjen e interesave strategjike të Kosovës. Në rrethanat aktuale, ai mbetet një domosdoshmëri politike dhe shtetërore për vendin.