The Economist sjell një analizë mbi mënyrën sesi rritja e shpenzimeve për mbrojtjen në Europë, si përgjigje ndaj agresionit rus dhe paqëndrueshmërisë së politikës amerikane, po gjeneron një rilindje industriale në disa qytete të braktisura më parë.

Bourges, Francë Ky qytet me 64,000 banorë, i vendosur në “diagonalen e zbrazët” të Francës, po përjeton një rritje të jashtëzakonshme ekonomike falë investimeve të mëdha në industrinë e armatimeve. Kompanitë MBDA dhe KNDS planifikojnë të investojnë 1 miliard euro dhe të krijojnë 2,500 vende pune deri në vitin 2030. Përveç përfitimeve, qyteti përballet me sfida në infrastrukturë, banim dhe mungesë të fuqisë punëtore të kualifikuar.

Unterlüss, Gjermani Qyteti gjerman me 3,500 banorë është kthyer në epiqendër të aktivitetit të Rheinmetall, gjiganti i mbrojtjes që ka nisur ndërtimin e një fabrike të re për municione. Ndërsa investimet po rriten dhe paga të mira ofrohen, banorët lokalë përballen me ndotje, zhurmë dhe presion në infrastrukturë – shpesh pa përfitime të drejtpërdrejta.

Stalowa Wola, Poloni I vendosur në një nga rajonet më të varfra të Polonisë, ky qytet është kthyer në një pikë kyçe për industrinë polake të mbrojtjes, ku prodhohet automjeti i blinduar Borsuk. Qeveria polake kërkon që gjysma e armatimeve të prodhohen brenda vendit, çka mund të çojë në një rimëkëmbje të fuqishme industriale për qytete si Stalowa Wola.

Në vend të përfundimit Komisioni Europian parashikon që rritja e shpenzimeve të mbrojtjes mund të shtojë 0.5% në PBB-në e BE-së deri në vitin 2028. Megjithatë, pa një menaxhim të kujdesshëm, valët e investimeve mund të sjellin ndarje sociale dhe pakënaqësi që favorizojnë ekstremizmin politik.