Prokuroria Themelore në Prishtinë ka konfirmuar se sot ka ndodhur një rast i rëndë në kryeqytet, ku një person ka humbur jetën në rrethana ende të pasqaruara, po ashtu një grua u lëndua.

Sipas njoftimit zyrtar të Prokurorisë, rasti ka ndodhur në “Rrugën B” në Prishtinë. Viktima është një mashkull, trupi i të cilit është dërguar për obduksion në Institutin e Mjekësisë Ligjore.

“Prokurori kujdestar ka dalë në vendin e ngjarjes së bashku me njësitet relevante të Policisë së Kosovës, dhe ka urdhëruar ndërmarrjen e veprimeve të menjëhershme hetimore për ndriçimin e plotë të rastit,” thuhet në komunikatën e Prokurorisë.

Ndaj rastit është iniciuar procedurë penale me kallëzim penal si “Hetim mbi vdekjen”, me qëllim të sqarimit të plotë të rrethanave që çuan deri te vdekja e personit.

Prokuroria bën të ditur se është duke ndërmarrë të gjitha veprimet e nevojshme hetimore për të zbardhur plotësisht këtë rast tragjik.