Ylli i Spanjës, Rodri Hernandez, ka deklaruar se është plotësisht shëruar nga dëmtimi i ligamentit të kryqëzuar, pak më pak se një vit pas tij. Kjo i jep trajnerit Luis de la Fuente një vendim për të bërë para përballjes së tyre ndaj Turqisë të dielën në mbrëmje.

La Roja nisi fushatën e kualifikimeve për Kupën e Botës me një fitore të qetë 3-0 ndaj Bullgarisë në Sofje. Rodri ka hyrë në minutën e 62-të për të zëvendësuar Martin Zubimendi, dhe është në konkurrencë për një vend titullari ndaj Turqisë. Kjo ishte paraqitja e tij e parë me Spanjën që nga dëmtimi, të enjten e kaluar.

Mediet gjithashtu e pyetën për këshillën që i dha Lamine Yamal pas fitores në finalen e Euro 2024 ndaj Anglisë. Kamerat kapën momentin kur Rodri i tha 16-vjeçarit: “Vazhdo punën, vëlla… Vazhdo punën sepse mund të arrish çfarëdo që dëshiron”.

“Nuk doja të më kapnin kamerat”, ka thënë ai për “Diario AS” para ndeshjes me Turqinë.

“Është një reflektim i faktit se ata duhet të vendosin talentin e tyre të madh në shërbim të ekipit dhe futbollit. Kemi parë shumë raste të tilla që humbasin rrugës. Lamine është një talent i jashtëzakonshëm dhe një rast i veçantë. E shoh të lumtur dhe duke bërë gjëra mirë”, ka thënë ai.

Mesfushori i Manchester City është kthyer në aksion në qershor gjatë Botërorit të Klubeve, por pësoi një problem muskulor që e mbajti jashtë deri në fund të gushtit. Megjithatë, Rodri mbetet optimist për të ardhmen.

“Absolutisht [jam shëruar]. Kur ke një dëmtim të këtij shkalle, çfarë dëshiron si lojtar është të mbyllësh kapitullin sa më shpejt dhe të përkushtohesh te ajo që do. Kam ende një rrugë të gjatë përpara. Është diçka natyrale, do të vijë me kohë. Jam i etur për të konkurruar dhe për të ndjerë mirëqenie, që është pjesa më e vështirë. Por nëse ka kaluar një vit dhe trupi nuk të shqetëson, kjo është më e rëndësishmja”, ka thënë ai.

Kampion i tanishëm i Ballon d’Or është pyetur edhe për kë do të votonte këtë vit, pasi sezonin e kaluar mundi Vinicius Junior dhe Jude Bellingham për çmimin.

“Ballon d’Or është i vështirë. PSG ka qenë ekipi i sezonit, dhe do të ishte e vështirë të mos ia jepje dikujt nga ai ekip. Jam i lumtur për Luis Enrique. Do të doja të shihja Lamine ose Pedri ta fitonin për afeksionin që kam ndaj tyre, por për meritë sportive, Dembele ose Vitinha”, ka thënë ai.