Ish-zyrtari i lartë amerikan, James Rubin, po e jep dëshminë e tij në Hagë i ftuar nga mbrojtja e ish-presidentit Hashim Thaçi.

Përveç avokatit të Thaçit, Luka Misheviq, ai është pyetur edhe nga avokati i Kadri Veselit, rreth arsyetimit të tij për ndërhyrjen ndërkombëtare në Kosovë.

Ish-ndihmëssekretari amerikan, ka deklaruar se pas Bosnjës, ku ndodhën krime të tmerrshme, qëllimi ishte të mbroheshin civilët dhe të parandalohej përsëritja e atij tmerri.

Rubin ka thënë se shqiptarët e Kosovës po vriteshin vetëm pse ishin shqiptarë.

“Donim të ishim në anën e viktimave. Ata, jo vetëm që ishin të shtypur, por po masakroheshin”.

“Synimi ishte që njerëzit të ishin të lirë dhe të mos ndiqnin politikat e shtypësit të tyre”, ka thënë Rubin.