Palestra “Bill Clinton” në Ferizaj të shtunën do të jetë arena e dy përballjeve vendimtare për Superkupën e Kosovës në hendboll, ku katër skuadrat më të mira në vend do të synojnë trofetë e radhës. Nga ora 17:30, nis sfida mes Istogut dhe Ferizajt në konkurrencën e femrave.

Dy skuadrat, të njohura për rivalitetin e fortë dhe cilësinë e lartë të lojës, do të matin forcat për një nga trofetë më të rëndësishëm të sezonit. Mbrëmja kulmon me përballjen e shumëpritur në konkurrencën e meshkujve. Në orën 20:00, Rahoveci dhe Kastrioti do të zbresin në parket për të vendosur fituesin e Superkupës. Të dy ekipet kanë shfaqur formë të shkëlqyer dhe synojnë me ngulm trofeun, duke premtuar një ndeshje spektakolare.

Një e shtunë e mbushur me emocion, adrenalinë dhe hendboll cilësor pret të gjithë sportdashësit në Ferizaj.