Shtetet e Bashkuara të Amerikës (ShBA) pritet ta furnizojnë Ukrainën me raketat “Patriot”, urgjentisht të nevojshme për mbrojtjen nga dronët rusë. Presidenti amerikan, Donald Trump, ka njoftuar se sistemet e mbrojtjes do të paguhen nga Bashkimi Evropian (BE). “Ne do t’u dërgojmë atyre ‘Patriotët’, për të cilat ata kanë nevojë urgjentisht”, ka thënë Trumpi. Megjithatë në bazën ajrore Andrews para gazetarëve, ai e la të hapur numrin e saktë të sistemeve që do të dërgonte, por ka thënë se do jenë disa.

“Armët do të financohen nga BE-ja.  Populli i Ukrainës ka nevojë për mbrojtjen e ‘Patriotëve’, por Bashkimi Evropian po paguan për këtë. Ne nuk po paguajmë asgjë. Është marrëveshje biznesi”, ka thënë Trumpi.

Duke iu referuar një takimi të ardhshëm me sekretarin e përgjithshëm të NATO-s, Mark Rutte, presidenti Trump ka thënë se aleanca transatlantike e mbrojtjes do të blejë teknologji ushtarake amerikane. “Ne në thelb do t’u dërgojmë atyre pjesë të ndryshme të pajisjeve të sofistikuara ushtarake dhe ata do të na paguajnë 100 për qind për këtë”, ka thënë Trumpi, i cili planifikon të takohet me Rutte këtë javë për të diskutuar mbi Ukrainën dhe çështje të tjera, raporton “DW”.

Sistemet e mbrojtjes raketore nevojiten me urgjencë

Ukraina i ka kërkuar ShBA-së t’i shesë më shumë raketa dhe sisteme “Patriot”, të cilat i konsideron me rëndësi thelbësore për mbrojtjen e qyteteve të saj kundër sulmeve ajrore ruse. Që nga fillimi i muajit, Rusia ka intensifikuar më tej intensitetin e sulmeve, veçanërisht kundër qyteteve në Ukrainë. Më 4 korrik, presidenti ukrainas, Volodymyr Zelensky ,ka folur për sulmet më të dhunshme që nga fillimi i luftës, sipas tij ushtria ruse ka sulmuar me rreth 540 dronë. Që atëherë, kanë pasuar sulme të tjera ruse, duke përfshirë qindra dronë. Gjatë fundjavës janë raportuar vdekje të tjera dhe më shumë se dhjetë të plagosur si pasojë e sulmeve ruse.

Gjermania merr pjesë në furnizimin me raketa “Patriot”

Sistemet “Patriot” të përmendur nga Trumpi mund të jenë sistemet e përmendura të enjten e kaluar në konferencën e rindërtimit mbi Ukrainën në Romë. Kancelari Friedrich Merz, ka njoftuar publikisht atje për herë të parë se do të blinte sisteme të mbrojtjes ajrore “Patriot” nga ShBA-ja për t’i dërguar ato në Ukrainë. Atje, mund të përfshihen dy sisteme dhe një tjetër mund të paguhet nga Norvegjia. Deri më tani, Ukraina ka marrë tre sisteme “Patriot” nga Gjermania,  të cilat ishin pjesë e Bundeswehr-it.

Kujtojmë se Trumpi kishte pezulluar furnizimet me armë në Ukrainë, por më pas është tërhequr nga ky vendim. Të hënën e kaluar, ai ka njoftuar për furnizime shtesë me armë në Ukrainë, por pa dhënë detaje. Shtetet e Bashkuara kanë qenë një nga mbështetësit më të mëdhenj të Ukrainës që nga fillimi i luftës në Ukrainë, kur demokrati Joe Biden ishte ende president i ShBA-së. Edhe nën pasardhësin e tij, Trump, ShBA-ja ka mbetur furnizuesi më i rëndësishëm me armë i Ukrainës. Megjithatë, pasi Trumpi është kthyer në Shtëpinë e Bardhë në janar, Shtetet e Bashkuara janë afruar me Rusinë, duke përfshirë edhe nisjen e bisedimeve të drejtpërdrejta midis përfaqësuesve.

Gjatë fushatës së tij zgjedhore, Trumpi kishte premtuar t’i jepte fund luftës menjëherë pas marrjes së detyrës si president. Por kanë kaluar pesë muaj që atëherë dhe lufta vazhdon të shpërthejë me intensitet edhe më të madh.