Presidenti i ShBA-së, Donald Trump, injoroi si Cristiano Ronaldon ashtu edhe Lionel Messin kur u pyet për të zgjedhur futbollistin më të madh të të gjitha kohërave, duke preferuar në vend të tyre një tjetër figurë legjendare të këtij sporti.

Ronaldo dhe Messi kanë fituar së bashku 13 herë Topin e Artë, pasi dominuan botën e futbollit gjatë fundit të viteve 2000 dhe dekadës së 2010-ës.

Karriera e Ronaldos përfshin periudha me Sporting Lisbonën, Manchester United, Real Madridin, Juventusin dhe aktualisht Al Nassr në Arabinë Saudite, ku luan ende edhe sot.

40-vjeçari ka shënuar 800 gola në 1,062 ndeshje me klubet dhe ka fituar tituj kampionë në Angli, Spanjë dhe Itali, ndërkohë që ka edhe pesë tituj të Ligës së Kampionëve, të fituara me United dhe Realin.

Ai ka triumfuar edhe me kombëtaren e Portugalisë, duke përfshirë Kampionatin Europian dhe dy trofe të Ligës së Kombeve të UEFA-s, më i fundit i fituar këtë verë pas fitores ndaj Spanjës.

Karriera e Messit ka përfshirë klubet Barcelona, Paris Saint-Germain dhe aktualisht Inter Miami.

Messi ka fituar Ligën e Kampionëve katër herë – të gjitha me Barcelonën – si dhe ka fituar shumë tituj kampion në Spanjë dhe Francë.

38-vjeçari ka fituar gjithashtu trofe të rëndësishëm me Argjentinën, përfshirë dy Kupa Amerika dhe Kupën e Botës në vitin 2022, pas një finale dramatike me penallti ndaj Francës.

Messi ka realizuar 771 gola në 951 ndeshje me klubet – dhe numri vazhdon të rritet.
Tani ai luan në MLS me Inter Miami, ndërkohë që SHBA sapo ka pritur Kupën e Botës për Klube të FIFA-s, të cilën e fitoi Chelsea pas fitores 3-0 ndaj PSG-së në finale gjatë fundjavës.

Kjo ndodh ndërsa SHBA do të bashkë-organizojë Kupën e Botës vitin e ardhshëm së bashku me Kanadanë dhe Meksikën.

Presidenti amerikan Trump u pyet nga transmetuesi DAZN se kë konsideron si futbollistin më të madh të të gjitha kohërave.

Dhe në vend që të përmendte Ronaldon apo Messin, siç do të bënin shumë të tjerë, ai zgjodhi legjendën braziliane Pele, të cilin e konsideron si “GOAT” të futbollit.

Ai tha: “Shumë vite më parë, kur isha i ri, sollën një lojtar me emrin Pele për të luajtur, dhe ai luajti për një ekip që quhej Cosmos. Ai ishte frymëzimi ynë, dhe stadiumi ishte i mbushur plot. Ishte një version më i hershëm i këtij stadiumi, por pikërisht këtu në Meadowlands, dhe ishte Pele. Nuk dua të dukem si shumë i vjetër, por kjo ka ndodhur shumë kohë më parë. Isha djalë i ri dhe erdha të shihja Pelen dhe ai ishte fantastik. Do të thoja, ndoshta do të shkoj me klas ikët. Është si të thuash Babe Ruth, por do të thoja që Pele ishte vërtet i madh”.

Pele – emri i vërtetë i të cilit ishte Edson Arantes do Nascimento – kaloi shumicën e karrierës së tij në klubin Santos në Brazilin e tij të lindjes, përpara se të luante për një periudhë në SHBA me New York Cosmos.

Por ishin arritjet e tij me Brazilin që pushtuan imagjinatën e tifozëve të futbollit në mbarë botën, me 77 gola në 92 ndeshje me kombëtaren.

Ai ndihmoi Brazilin të fitonte tre Kupa Bote – në vitet 1958, 1962 dhe 1970 – dhe ndërroi jetë në dhjetor të vitit 2022 në moshën 82-vjeçare.