Presidenti ukrainas Volodymyr Zelensky njoftoi të dielën se Ukraina ka nënshkruar marrëveshje të reja me partnerë ndërkombëtarë për të rritur prodhimin e përbashkët të armëve, përfshirë armë me rreze të gjatë veprimi dhe dronë interceptues, në përpjekje për të përballuar sulmet e vazhdueshme ruse.

“Duhet – dhe patjetër që do të ketë – më shumë mbrojtje për jetën,” deklaroi Zelensky. “Ne po rrisim prodhimin e përbashkët të armëve me partnerët tanë: armë me rreze të gjatë veprimi për të ulur oreksin e Rusisë për vrasje dhe dronë interceptues për të mbrojtur popullin tonë.”

Sipas tij, një marrëveshje u arrit me një kompani amerikane për prodhimin e dronëve, ndërsa marrëveshja me Danimarkën shënon bashkëprodhimin e parë të armëve në tokën ukrainase nga një vend i huaj.

Zelensky falënderoi aleatët ndërkombëtarë për mbështetjen e vazhdueshme ndaj sektorit ushtarako-industrial të Ukrainës dhe për forcimin e kapaciteteve të saj mbrojtëse.