Kandidatja për deputete nga Lidhja Demokratike e Kosovës (LDK), Janina Ymeri, ka reaguar lidhur me protestat kundër KEDS/KESCO, duke vlerësuar se ato po e devijojnë vëmendjen nga përgjegjësi kryesor për rritjen e çmimit të energjisë elektrike.

Sipas Ymerit, KEDS/KESCO nuk ka kompetencë ligjore për të vendosur rritjen e çmimit të rrymës, pasi ky vendim merret nga Zyra e Rregullatorit për Energji (ZRRE) dhe nga qeveria në pushtet. Ajo thekson se përgjegjësia kryesore bie mbi Kryeministrin në detyrë, Albin Kurti, dhe institucionet që ai i kontrollon.

Ymeri shton se, ndonëse ka arsye të tjera për kritika ndaj KEDS-it, si investimet e pamjaftueshme apo problemet me tensionin, shtrenjtimi i energjisë është rezultat i vendimeve institucionale në favor të tregtarëve të energjisë, e jo i operatorit shpërndarës. Sipas saj, adresa e përgjegjësisë është Zyra e Kryeministrit.

Postimi i plotë:

Për shkak që KEDS/KESCO nuk ka mundësi ligjore të aprovoj rritjen e çmimit të energjisë elektrike as të importoj pa shkak, protesta para KEDS edhe në thirrje e pankarta kundër KEDS/KESCO më shumë devijon vēmendjen dhe ul presionin në shkaktarin kryesor të kësaj gjendje e që është kryeministri në detyrë, Albin Kurti.
Megjithëse duhej të ishte në shërbim të Kosovës, nga të dhënat e çmimet që po rriten, po shihet që për vite me rradhë ka punuar në favor të Mafisë Energjetike edhe këtu është fatkeqësia.
Ndonëse ka shumë arsye për të protestuar kundër KEDS-it (investimet e vogla, tensioni i ulët etj) po rryma e shtrenjtë është vendim i ZRRE-së dhe partisë në pushtet për llogari të NOA, EFT, GEN, e kompanive te ngjajshme e jo se ia kanë hatrin KEDS-it.

Edhepse VV ka edhe Ministrinë e Ekonomisë edhe ZRRE – në, sikurse në listë të deputetëve, në VV ka një emër dhe të tjerët janë siç i ka paraqitur Kurti, pra numra serik.
Në këtë lloj qeverisje me 1 emër e mijëra numra serik në ekzekutiv e plot institucione publike, adresa e përgjegjësisë dihet, është Zyra e Kryeministrit.
Që nga 2021 me instalim të aparatatit të tregtarëve me licenca e ambasadë, ne jemi shtyrë të punojmë si ora për tregtarë të energjisë elektrike, deri në 1 Milionë Euro në ditë.
Pa dhimbje, pa na vënë veshin që sa vjet tanimë duke na hapur propagandë se kinse KEDS/KESCO po operon në vete edhe është shkaktar i vetëm i rritjes së çmimit të rrymës kur në fakt vendimin e ka dhënë ZRRE.