Të paktën 12 persona humbën jetën dhe nëntë të tjerë mbetën të plagosur pas një sulmi me armë zjarri që ndodhi mbrëmjen e së martës në një vendbanim informal në Cleveland, në lindje të Johanesburgut, njoftoi policia e Afrikës së Jugut.

Tetë burra dhe tre gra u shpallën të vdekur në vend, ndërsa një burrë tjetër ndërroi jetë më vonë në spital si pasojë e plagëve të marra. Nëntë persona të tjerë të plagosur po marrin trajtim mjekësor.

Autoritetet thanë se më shumë se 10 persona të dyshuar mbërritën në zonë me një automjet të bardhë tip Toyota Quantum pranë një pike karburanti në Cleveland.

“Të dyshuarit hynë në vendbanimin informal nga të dy hyrjet dhe lëvizën nëpër zonë duke hapur zjarr ndaj banorëve në disa vende të ndryshme, përpara se të largoheshin me të njëjtin automjet”, thuhet në deklaratën e policisë.

Motivet e sulmit mbeten ende të paqarta dhe deri më tani nuk është arrestuar asnjë person.

Policia ka nisur një operacion të gjerë kërkimi për autorët dhe u ka bërë thirrje qytetarëve që disponojnë informacione të ndihmojnë hetimet.