Ministri i Shëndetësisë, Uran Ismaili, ka bërë me dije se janë suspenduar tre mjekë në Qendrën Klinike Universitare të Kosovës për shkak se gjatë inspektimit nuk kanë qenë në vendin e punës.

Po ashtu ai nëpërmjet llogarisë së vet në “Facebook” ka treguar se edhe tre punëtorë të tjerë në QKUK janë komision disiplinor

Postimi i plotë i Ismailit:

Porsa u njoftova nga Bordi i ShSKUK-së, se gjatë një inspektimi, të cilin e ka bërë drejtori i këtij institucioni Basri Sediu, gjatë natës së djeshme, në disa klinika nuk i ka gjetur fare në vendin e punës disa mjekë dhe infermierë.

Si rrjedhojë, tre mjekë janë suspenduar nga puna, tre të tjerë janë dërguar në Komision disiplinor përfshirë edhe dy infermierë.

Duke e mirëkuptuar punën e vështirë dhe lodhjen e madhe që mund ta kenë gjatë ushtrimit të profesionit, mungesa në vendin e punës nuk e arsyeton askënd. Mungesa e tyre në vendin e punës mund të jetë humbje e madhe për dikë.

Ne po punojmë çdo ditë që të përmirësojmë kushtet për personelin mjekësor në vend, siç bëmë ditë më parë duke rritur pagat e kujdestarive për ta, por çdokush që sillet në mënyrë të papërgjegjshme karshi punës dhe qytetarëve tanë, nuk e meriton të jetë aty.

Këtë sjellje nuk e meritojnë mijëra profesionistë shëndetësorë, të cilët e bëjnë punën e tyre me nder dhe përgjegjësi, që të njollosen nga raste të tilla. Prandaj, në këto situata, nuk do të ketë kompromis dhe askush nuk do të falet.