Kryeministri i Republikës së Kosovës, Albin Kurti, ka pritur një delegacion të Komisionit për Integrim Evropian të Kuvendit të Shqipërisë.

Ky delegacion ishte i kryesuar nga kryetarja e këtij komisioni, Jorida Tabaku, e i përbërë nga deputetë të Partisë Socialiste, Partisë Demokratike dhe Partisë së Lirisë dhe nga ambasadori i Shqipërisë në Kosovës, Qemal Minxhozi.

Në takim është diskutuar për rëndësinë e bashkëpunimin ndërmjet Kosovës dhe Shqipërisë në fushën integrimit evropian dhe politikës së jashtme dhe për nevojën e përhershme për bashkërendim dhe koordinim, ka njoftuar zyra e kryeministrit.

Gjithashtu, ata  kanë dhënë mbështetjen e tyre të plotë për aplikimin e Kosovës në Bashkimin Evropian (BE), të dorëzuar në dhjetor të vitit të kaluar dhe në Këshillin e Evropës (KE), të dorëzuar në maj të vitit 2022.

Tabaku në emër të delegacionit e ka uruar kryeministrin Kurti për përvjetorin e 15-të të pavarësisë së Kosovës.

Ndërsa kryeministri Albin Kurti i ka falënderuar deputetët për vizitën, bashkëpunimin e deritanishëm dhe për gatishmërinë për të bërë edhe më shumë në shërbim të thellimit të marrëdhënieve ndërmjet Kosovës dhe Shqipërisë.