Kryetari i Partisë Demokratike të Kosovës (PDK), Memli Krasniqi, me rastin e Ditës memoriale të të mbijetuarve të dhunës seksuale gjatë luftës,  ka thënë se është detyrë e të gjithëve t’i mbështesim në të gjitha format dhe mundësitë në jetën e tyre.

“Sot, në Ditën memoriale të të mbijetuarve të dhunës seksuale gjatë luftës në Kosovë, bashkëndjejmë me të gjitha viktimat e këtyre akteve kriminale të kryera nga forcat serbe në vendin tone”, ka shkruar Krasniqi në “Facebook”.

Më tutje, Krasniqi ka thënë se kriminelët që e përdorën dhunën seksuale duhet të dalin para drejtësisë.

“Vuajtjet, llahtaria e tmerri i përjetuar nga këto viktima mbetet plagë e hapur e cila do të rënkojë përherë në shoqërinë tone. Kriminelët, që e përdorën dhunën seksuale si mjet lufte, në vazhdën e krimeve të panumërta gjatë luftës në Kosovë, duhet gjinden dhe të dalin para drejtësisë të gjithë”, ka shkruar Krasniqi.